မြောက်ဖျားက ဆောင်းရာသီ

တစ်နေ့တာလုံး နေရောင်ခြည် ကောင်းစွာရရှိလေ သောအခန်းလေးတွင် ကျွန်မနေပါသည်။ အခန်းသည် အစဉ်လိုပင် နွေးထွေးနေတတ်၏။ နွေအခါတွင် ပူပြင်း ကာ ဆောင်းတွင်တော့ ပြင်ပက အေးမြခြင်းကိုပင် မသိတတ်နိုင်အောင် ခပ်နွေးနွေးပင်ရှိသည်။

ညနေခင်း ရုံးက ပြန်ရောက်ချိန်၌ဖြစ်စေ၊ ညဥ့်နက်လျှင်ဖြစ်စေ၊ သို့တည်းမဟုတ် နံနက်ခင်း အိပ်ရာက နိုးထလျှင်ဖြစ်စေ ကျွန်မသည် ဆောင်း၏ အငွေ့အသက်ကို နည်းနည်းမျှပင် မခံစားရပါ။ အေးမြလှသော ဒေသတွင် မွေးဖွားကြီးပြင်းခဲ့သူဖြစ်သလို ဆောင်းသိပ်မပီပြင် သည့်မြို့၏ အတွင်းပိုင်းလိုနေရာတွင် နေရတာကြောင့်လားမသိ။ ရန်ကုန်ဆောင်းသည် သည်နှစ် သူတကာ စာဖွဲ့တတ်ကြသလိုဖြင့် ကျွန်မကို မပြုစားနိုင်ချေ။

သိပ်အေးတာပဲဟု ပြောတတ်သော မိတ်ဆွေများကို ရယ်ပွဲဖွဲ့လျှင် သူတို့၏ မျက်စောင်းများနှင့် ရင်ဆိုင်ရလေ့ ရှိပါသည်။
“အေးလေ နင်ကတော့ ဘယ်အေးပါ့မလဲ”ဟု အနွေးထည်အလှကို ရာသီဥတု နည်းနည်းအေးသည်နှင့် ထုတ်ဝတ်ချင်သော သူငယ်ချင်းက ပြောတတ်သည်။


သည်လိုဆိုလျှင်တော့ “ငါတို့ဆီမှာလေ”ဟု အစချီကာ မြောက်ဖျားက ဆောင်းရာသီ အေးမြပုံအကြောင်း ကျွန်မ စိတ်လိုလက်ရ ပြောပြချင်လာပါသည်။ ပြောပြချင်နေ သည့်အချိန်နှင့် တိုက်ဆိုင်လာလျှင်တော့ စကားစလာသူ မှာ ကျွန်မ ပြောသမျှ နားထောင်ပေတော့။

“တို့ဆီမှာ အေးတာက မီးတောင် လှုံရတာကိုး။ ညည ဆို ခြံထဲမှာ မီးဖိုကြီးမှ အကြီးကြီးပဲ ဖိုတာ။ ထင်းတုံးတွေ ဆိုင်ပြီး ညမိုးချုပ်ရင် မီးဖိုတော့တာပဲ။ မီးလှုံရင်း ခေါပုတ်လေး ကင်စားရတဲ့အရသာများ ဘာနဲ့မှ မလဲနိုင်ဘူး”

သူတစ်ပါးကို အားကျစေလိုစိတ်နှင့် ပြောမိသော ကျွန်မမှာ နောက်ဆုံးတော့လည်း ကိုယ်တိုင်ပင် ပြန်လွမ်း ရပါတော့သည်။ သူငယ်ချင်းက တစ်ခဏမျှသာ သည်အ ကြောင်းများ စိတ်ဝင်စားဖော်ရပြီး တစ်ဖန် အာရုံပြောင်းချိန်တွင်တော့ ကျွန်မတစ်ယောက်သာ အလွမ်းများ တစ်ပွေ့တစ်ပိုက်နှင့် ကျန်ရတတ်သည်။

ဇာတိမြေ ကချင်ပြည်နယ်က ဆောင်းရာသီကို လွမ်း တသော ကျွန်မသည် တကယ့်တကယ်တော့ ထိုမြေက ဆောင်းနှင့် ဝေးခဲ့သည်မှာ နှစ်များစွာကြာခဲ့ပါပြီ။ အလုပ်ခွင်ဝင်ပါပြီဆိုကတည်းက သင်္ကြန်ပိတ်ရက်သာ အိမ်ပြန်ဖြစ်လေရာ ဆောင်းကိုမကြုံရပြီ။ သင်္ကြန်ကာလတွင် နံနက်ခင်းအစောပိုင်းများ၌ အေးမြမြအထိအတွေ့ကို ခံစားရသေးသည်။ ကျေနပ်ရပါသေးသည်။ သို့သော် ကျွန်မ လွမ်းတသော ဆောင်းကိုတော့ မမီပြီ။

“အေးနေပြီလားဟင်”ဟု အိမ်နှင့် ဖုန်းပြောရတိုင်း ကျွန်မ သတိတရမေးတတ်ကာ စိတ်ကူး၌လည်း အိမ်သို့ အပြေးပြန်တတ်ပါသည်။ စိတ်ကူးနှင့်ပင် ဆောင်းကိုမြင်သည်။ မီးဖိုမှာ မီးလှုံရသည်။ ခေါပုတ်ကင်နံ့ပင် တသင်းသင်းရသည် ထင်မှတ်လာ၏။ စိတ်နှင့်လူ တစ်ဖန်ကပ်သော် ရန်ကုန်မြေ၌ ခြေမြဲမြံလျက်။ အာရုံတိမ်းပွေ ချိန်တိုင်းတော့ စိတ်က တိမ်စိုင်လို မျောလွင့်မြဲ။

ကျွန်မတို့ ငယ်ရွယ်စဉ်ကတော့ ဆောင်းကို ကျောင်းတက်ရက် နံနက်ခင်းများနှင့် တွဲလျက် မှတ်မိစရာဖြစ်ရပါသည်။ ထိုစဉ်က ကျွန်မသည် မြို့တွင်ကျောင်းတက်စဉ် အဘွားအိမ်၌ နေထိုင်ရသည်။ အဘွားသည် အခြားသော အချိန်များ၌ ချစ်ဖွယ်ကောင်းတတ်သော်လည်း နံနက်ခင်း အလင်းရောက်သည်နှင့် အိပ်ရာက အတင်းနှိုးတတ်တာ တစ်ခုကိုတော့ ကျွန်မ မကြိုက်ခဲ့ပါပေ။

ဆောင်းက အေးလှသည်မို့ ဂွမ်းစောင်ပုံထဲက ထွက်ဖို့ဆိုသည်မှာ စိန်ခေါ်မှုသဖွယ်တည်း။ ဂွမ်းစောင် ထူအိအိကြီးများထဲ ပုစွန်ထုပ်များလို ကွေးကွေးလေး အိပ်စက်ရသည်မှာ ဘယ်လောက် ဇိမ်ရှိပါသနည်း။ သည်လိုသာ မထတမ်းအိပ်ချင်သည်ဟု ငယ်စဉ်က အကြိမ်ကြိမ်တွေးဖူးသည်။ ကျောင်းမတက်ရလည်း ကောင်းသားပဲ။ သို့သော်လည်း အချိန်တန်လျှင်တော့ အဘွားသည် စောင်များကို ဆွဲခွာကာ အိပ်ရာက နှိုးတတ်သည်။

“ထတော့ ဒီကလေးဟာ နေမြင့်တဲ့အထိ အိပ်ချင် တယ်။ ကျောင်းသွားရမယ့်ဟာ စာလေးဘာလေးလည်း ကျက်ဦး၊ ထ၊ ထ”
အဘွားသည် သည်မျှသာ ဆော်သြနိုင်ကာ ဈေးသို့ ဆွဲခြင်းကလေးဆွဲပြီးထွက်သည်။ အသက်ကြီးသော်ငြား နံနက်တိုင်းဈေးသွားမြဲ။ ဟင်းလျာစီမံမြဲ။

ခြံဝင်းထဲမှ အဘွားထွက်သွားသည်ကို သေချာအောင် ချောင်းကြည့်ပြီးသော် စောင်ပုံထဲ တစ်ကျော့ပြန် ခွေပါသည်။ အပြင်တွင် အေးလှသည်မဟုတ်လား။ ကြမ်းပြင်ကလည်း အေးစက်နေသည်။ လေကလည်း အေးစက်နေသည်။ သည့်ထက် ရေအေးအေးနှင့် မျက်နှာ သစ်ရမည်ဆိုသည်ကို အထိတ်လန့်ဆုံးတည်း။ ရေချိုး ဖို့ဆိုသည်မှာတော့ အိပ်မက်ပင် မက်ကောင်းသည်မဟုတ်။

အိပ်ရာနွေးနွေးကို ဘယ်သို့ပင် ခင်တွယ်သော်လည်း အဘွားပြန်မလာမီတော့ အပြေးထရသည်။ မျက်နှာသစ်၊ သနပ်ခါးလိမ်းကာ အ၀တ်အစားလဲထားရသည်။ ပြန်လာလို့မှ အိပ်ရာထဲတွေ့သေးလျှင်တော့ အဘွား၏ ပါးစပ်ကို ကြောက်ရမည်မဟုတ်လား။

သို့နှင့် အချိန်တန်လျှင် နံနက်စာစား လွယ်အိတ်က လေးလွယ်ကာ ပတ်ဝန်းကျင်မှ အိမ်နီးနားချင်း အစ်ကို အစ်မတစ်သိုက်နှင့် ကျောင်းသွားပါတော့သည်။ ကျောင်းမှာ ဆယ့်ငါးမိနစ်မျှလျှောက်လျှင် ရောက်သည်။ ကျောင်းသို့ သွားရာလမ်းကတော့ ဆောင်းနံနက်ခင်းများ၌ အထူးလှသည်။ အထူးလှသည်ဟုသာ ကျွန်မ ထင်ပါသည်။

လမ်းသည် ကွေ့ကောက်ကာ ကျောင်းဘက်သို့ ဦးတည်သွားသည်။ သည်လမ်းပေါ်၌ ကျွန်မတို့လိုပင် ကလေးသိုက်တို့သည် ဟိုတစ်စု သည်တစ်စုဖြင့် ခြေလျင်သွားနေကြသည်။ နှင်းမကွဲသေး။ အဖြူအစိမ်းတူညီဝတ် စုံတို့သည် နှင်းမကွဲသေးသော မြူဆိုင်းသည့် ငွေဖြူ၊ ၀န်းကျင်က သစ်ပင်တို့၏ အစိမ်းတို့ရောသော သဘာဝအလှနှင့် အတော်ပင် လိုက်ဖက်သည်ကို သတိရသည်။

ကျွန်မတို့သည် ဆောင်းနံနက်ခင်းစောစောများတွင် ကိုယ့်ရှေ့ဝန်းကျင် မလှမ်းမကမ်းမျှသာ မြင်ကြရပါသည်။ အဝေးကို လှမ်းကြည့်သော် မသဲကွဲ။ မြူနှင်းများဆိုင်းဆဲ။ လေမှာ အေးစိမ့်၍နေသည်။ အနွေးဦးထုပ်ဆောင်း ထား၍ခေါင်းမစို။ မျက်နှာကတော့ ရေငွေ့ရိုက်စပြုကာ အေးစက်နေတတ်သည်။ မျက်တောင်ဖျား၌ နှင်းငွေ့များ ခိုတွဲနေတတ်သည်ကိုတော့ ကျွန်မ အလွန်သဘောကျပါသည်။ မျက်တောင်ကိုပင် ခဏခဏခတ်တတ်သေးသည်။ ရေစက်ပေါက်ကလေးများ မျက်နှာပေါ်ကျသည်ကိုလည်း နှစ်သက်တတ်သေးသည်။

စာသင်ခန်းထဲရောက်စ၌ လက်ချောင်းကလေးများ ကျင်ခဲနေသလို စာရေးရန် ခက်လှသည်။ ဘောလ်ပင်၊ ခဲတံတို့ကို မကိုင်တွယ်နိုင်။ လက်ချောင်းများ အချင်းချင်း ဆုပ်နှယ်လိုက်၊ ပါးစပ်က လေနှင့်နွေးထွေးစေလိုက်ပြုကာ စာရေးဖို့ကြိုးစားရသည်။ အတန်ကြာလျှင်တော့ အသားကျပေပြီ။ သည်သို့သာကျောင်းသူဘ၀၏ ဆောင်း နံနက်ခင်းများစွာကို အစီအစဉ်တကျ ဖြတ်ကျော်ခဲ့ရ သည်။

ငယ်စဉ်က ကျွန်မတွင် အနွေးအင်္ကျီအလှများမရှိပါ။ ကတီ်္တပါပြောင် နီညိုရောင်တစ်ထည်၊ ဆွယ်တာ မီးခိုးရောင်တစ်ထည်ပဲ ရှိခဲ့သည်လားမသိ။ သို့သော် မြို့စွန်၌ တည်ရှိသော ကျွန်မတို့ကျောင်းတွင် မျက်နှာငယ်စရာ စိုးစဉ်းမျှ ရှာမတွေ့။ ဘ၀တူတွေ ရှိသားပဲ။ တတ်နိုင်သည့် သူက အနွေးအင်္ကျီအလှများ ၀တ်ထားသော် အားကျငေး မောမည်။ သို့သော် မိဘကို ပူဆာရန်ကား တစ်ကြိမ်မှ စိတ်ကူးမရှိခဲ့စဖူး။ မပြည့်စုံလှသော ငယ်ဘ၀တွင် ကျွန်မ သည် ဆောင်းရာသီကိုတော့ မုန်းစိတ်မ၀င်။

နံနက်ခင်းစောစော၌ ချမ်းရအေးရသည့်ကြားထဲ ကျောင်းသွားရန် ထရခြင်းတစ်ခုကိုတော့ ကျွန်မ ငြူစူချင်သည်။ ကျွန်မက အအိပ်မက်သူ။ အိပ်ရာစောစော ထရသည့် ဆောင်းနံနက်ခင်းများကို မကြိုက်လှသော်လည်း ဆောင်းနေ၀င်ပြီးနောက် လေအေးများ ကြီးစိုးလာသည့် နေစောင်းချိန်များကိုတော့ ကျွန်မ အလွန်နှစ်သက်ပါသည်။

ဦးလေးသည် မှောင်စပျိုးသည်နှင့် ခြံထဲမှာ မီးဖိုပါတော့သည်။ မီးဖိုနေကျနေရာမှာပင် လောင်ကျွမ်းပြီးသား ထင်းတုံးဟောင်းကို မီးပြန်မွေးသည်။ သစ်ကိုင်းခြောက် နည်းနည်းထပ်ထည့်သည်။ မီးညွန့်ကလေး တက်လာလျှင် လှုံနိုင်ပေပြီ။

ခြံချင်းနီးသော ၀မ်းကွဲအစ်မနှင့် ကျွန်မသည် အဘွား အိမ်ပေါ်တွင် အိမ်စာအတူလုပ်ပြီးသော် မီးဖိုနားသို့ အပြေးကပ်ကြတော့သည်။ အိမ်သည် ထရံကာမို့ လေက တိုးဝင်လျက်ရှိရာ အေးလှသည်မဟုတ်လား။

ကျွန်မတို့သည် မီးဖိုအနီး ၀ိုင်းထိုင်နေကြသည့် လူကြီးများအကြား တိုးဝှေ့ထိုင်ကြသည်။ ခြေ၊ လက်တို့ကို ပူနွေးအောင် မီးလှုံကြသည်။ မီးဖိုဘေးတွင် ခေါပုတ် သို့မဟုတ် ပေါင်းတင်းကျည် (ကောက်ညှင်းကျည်တောက်) စသည်ဖြင့် လူကြီးများက တစ်ခုခု ကင်နေ၊ နွေးနေသည်ကို ငေးမျှော်ကာ စောင့်ကာ စားကြသည်။ အဘွားပြောပြတတ်သည့် ရှေးစကားများကို မျက်လုံးကလေး အ၀ိုင်းသားနှင့် နားထောင်တတ်ကြသည်။ အိပ်ချိန်တန်လျှင်တော့ ဂွမ်းစောင်ပုံများကြားထဲ နှစ်နှစ်ခြိုက်ခြိုက် အိပ်စက်ရခြင်းကို ဘယ်တော့မှမမေ့။

ဆောင်းရာသီ၌ပင် ကြုံရသော ကျောင်းပိတ်ရက် ရှည်များတွင်တော့ ရွာသို့ပြန်လျှင် ကျွန်မ နှစ်သက်သော ဟင်းလျာများအတွက် အသီးအရွက် အညွန့်အဖူးတို့ စုံလင်ပေပြီ။ မုန်ညင်းဖူးနုနုများရမည်။ ပဲရွက်နုများ ရမည်။ ပဲသီးနုများရမည်။ အားလုံးသည် စိမ်းစိမ်းစိုစို လတ်လတ်ဆတ်ဆတ်။ အချို့ကတော့ ခြံထဲတွင်ပင် ရနိုင်သည်။ အမေကိုယ်တိုင် စိုက်ပျိုးထားပေသည်။

အမေသည် ကျွန်မ အလွန်နှစ်သက်သော မုန်ညင်းစော(မုန်ညင်းချဉ်ရည်ဟင်း)ကို ချက်ကျွေးတတ်သည်။ ဟင်းလှော်ပေါင်းလုပ်ကျွေးတတ်သည်။ မုန်ညင်းပေါင်း လုပ်ကျွေးတတ်သည်။ ငါးပေါင်းလုပ်ကျွေးတတ်သည်။

ရွာက အိမ်ကလေးသည် ချောင်းနံဘေးတွင် တည်ရှိလေရာ ဆောင်းရာသီနံနက်စောစောများ၌ ရေပြင်ကို မြူနှင်းများအကြား မသဲမကွဲမြင်ရသည့် မြင်ကွင်းကိုလည်း ကျွန်မသတိရနေသည်။ အမေ လုပ်ပေးတတ်သော နံနက်စာ ထမင်းကြော်၊ ကော်ဖီပူပူတို့ကိုလည်း ဆောင်းနံနက်ခင်းများနှင့် တွဲဖက်ကာ မှတ်မိနေဆဲပင်။ ရွာတွင်တော့ ကောက်နှံတို့လည်း ပေါ်ပြီဖြစ်ရာ ခေါပုတ် လှိုင်လှိုင်ထောင်းကြဆဲ။

တစ်အိမ်အိမ်က ခေါပုတ်ထောင်းလျှင် နီးစပ်ရာက အမျိုးသမီးများ ၀ိုင်းကူကြသည်။ မောင်းတံပေါ် ခြေသုံးဖက်၊ လေးဖက်မျှ အချက်ညီညီ နင်းကြသည်။ မောင်းဆုံနားတွင် နေသူက ကျည်ပွေ့တွင် ကပ်နေသည့် ထောင်းလက်စ ကောက်ညှင်းစေးပျစ်ပျစ်ကို ခွာလိုက် ဆုံထဲ တစ်ဖန်ထည့်လိုက် ကျင်လည်စွာ လုပ်ပေးရသည်။ ဘက် လှည့်ပေးရသည်။ သည်မြင်ကွင်းကို ပြန်တွေးတိုင်း ကျွန်မသည် မောင်းဆုံရှေ့စောင့်တတ်သည့် ကြီးကြီး၏ လက်ယဉ်ပုံ၊ ကျွမ်းကျင်ပုံကို မမေ့။

မောင်းထောင်းနေသည့် အနီးတစ်ဝိုက် ကျွန်မတို့ ကလေးတစ်သိုက်က ကျင်လည်သော် ကြီးကြီးသည် ထောင်းလက်စထဲက အဆုပ်အဆုပ်ခွဲကာ လှမ်းပေးတတ်သည်။ မီးဖိုအနီးသို့အပြေးသွားကာ သီတံထိပ်တပ်လျက် ကင်စားရသည့်အရသာမှာ အမေကင်ပေးတတ်သည့် ခေါပုတ်ထက်ပင် စားကောင်းသလို ထင်တတ်ခဲ့သည်။ ခေါပုတ်များကို ၀ိုင်းကူကြသူများကိုလည်း ပေးရသည်။ အိမ်နီးနားချင်းများထံ ပို့ရသည်။ ဆွေမျိုးများကိုလည်း ခွဲပေးသေးသည်။

မိမိအိမ်က တစ်ကြိမ်တစ်ခါ ထောင်းလျှင် အများကို ပေးဝေသလို ပတ်ဝန်းကျင်က ထောင်းလျှင်လည်း အိမ်ကို အပို့ရောက်သည်သာ။ သည်တော့ အိမ်တွင် ခေါပုတ်မပြတ်။ စားစရာလည်း မပြတ်။ ကျောင်းပိတ်ရက်လွန်၍ မြို့သို့ ပြန်သော် စားစရာများ သယ်ကာပြန်ရသည်။ မြို့ တွင်တော့ ကျွန်မ ကျောင်းတက်ခက်သည့် ချမ်းချမ်းစီးစီး နံနက်များက စောင့်ကြိုမြဲ။ သို့သော်လည်း မီးဖိုနံဘေး နွေးထွေးနေပျော်သော ညကာလများလည်း ရှိသေးသည်မို့ ဆောင်းကို ကြာရှည် စိတ်မကုန်ပြန်ချေ။

ငယ်ရွယ်စဉ်နှင့် ဆယ်ကျော်သက်ရွယ်တုန်းကပဲ ဘ၀ကို ပျော်စရာဟု ပိုမြင်တတ်ခဲ့လေသလားမသိ။ ပြန်စဉ်းစားလျှင် အရာရာသည် လွမ်းစဖွယ်တည်း။ တစ်နှစ်တော့ ဆောင်းရာသီပြန်ဖြစ်အောင် ပြန်ပါမည်ဟု ယခုတိုင် တွေးဆဲ။ ပြီးခဲ့သည့်တစ်ရက်က အမေနှင့် ဖုန်းပြောရသော် ဆောင်းရာသီတွင် ကျွန်မ တစ်ကြိမ်မှ မပြန်ဖြစ်တော့သည်ကို အမေက သတိတရ ပြောလိုပြန်သည်။

“တစ်ခါတော့ ဆောင်းတွင်း ပြန်လာဦးလေ။ စားစရာ ပေါတယ်ကော။ သမီး ပြန်လာတဲ့ နွေရာသီဟာ လုပ်ကျွေးချင်ရင်တောင် ဘာမှသိပ်မစုံတော့ဘူး။ ခေါပုတ်လည်း အဲဒီအချိန်လောက်ဆို ကုန်ပြီ”

အမေ့စကားသံသည် ဖုန်းချပြီးသော်လည်း နား၌ စွဲမြဲဆဲပင်။ သို့သော် အမေ့သမီးမှာတော့ ဆောင်းရာသီ အိမ်ပြန်ရေးဆိုသည်မှာ စေ့စေ့တွေးရန်မလိုဘဲ ထင်းထင်း ပေါ်မြဲအဖြေရှိပြီးသားပင်။ အသွားအပြန် လေးရက်မျှကြာသော ရွာကလေးသို့ ဘယ်မှာလျှင် ပိတ်ရက်ရှည်မရဘဲ ပြန်နိုင်ပါမည်နည်း။ ကြာတော့လည်း အလွမ်းနှင့် အသားကျကာ မလွမ်းရတော့ဘူးဆိုလျှင်ပင် မနေတတ်တော့ဘူး ထင်လာသည်။ လွမ်းရတာကိုပင် စည်းစိမ်တစ်မျိုးလို ထင်မှတ်ကာ လွမ်းတတ်လာသည်။

ခုတလောတော့ မြောက်ဖျားပိုင်းကို ပိုလွမ်းရသည်။ ရာသီဥတုအေးနေမည်ဆိုသည်ကို တွေးမိလျှင် တိုး၍ လွမ်းရသည်။ သည်တစ်ကြိမ်လွမ်းရသည်ကတော့ အစားအသောက်များကိုလည်း မဟုတ်။ ဆောင်းအလှကိုလည်း မဟုတ်။ မိသားစုကိုလည်း မဟုတ်။ နွေးထွေးလုံခြုံရာတွင် ရှိနေမည့် ကျွန်မ၏ မိသားစုကို စိတ်အေးရသော်လည်း မတတ်နိုင် လက်မှိုင်ချကာ အိမ်အပြန်လမ်း ငေးမျှော်နေရသူများကိုတော့ လွမ်းရပါပေသည်။

“အနွေးထည်လည်း မလောက်ဘူး။ တို့ဆီမှာ ဒီလောက် အေးတာ နင်သိတဲ့အတိုင်း၊ အိမ်ထဲမှာတောင် ဒီလောက် အေးတာ၊ တောထဲမှာ သူတို့ ဘယ်လောက် အေးမလဲ။ ငါလည်း ဘာလုပ်ပေးရမှန်း မသိတော့ဘူး”

တစ်နယ်တည်း၊ တစ်ခရိုင်တည်းကြီးပြင်းခဲ့ကြသော်လည်း ရန်ကုန်တွင်မှ ကြံကြံဖန်ဖန် တွေ့ကြုံခင်မင်ရသော အစ်မသည် တစ်ရက်၌ ခရီးမစမီ ကျွန်မကိုတိုင်တည်သည်။ မကြာခင် သူ ခရီးစမည်။ ကျွန်မတို့၏ ဇာတိ မြောက်ဖျားဆီ။ သူသည် အခါများစွာကလို အိမ်ကို အလည်ပြန်သည်မဟုတ်။ တောတွင်း၌ ရှိနေဆဲသူများထံ မြို့ပြမိတ်ဆွေများဆီက ရတတ်သမျှ အကူအညီများ သယ်ပိုးကာ သွားရန်ပြင်ခြင်း။

ကျွန်မက သူ့ကို တိတ်တဆိတ် ပူပင်ဆဲ။ သူကတော့ သူ့ကိုယ်သူထက် အိမ်မပြန်နိုင်သေးသည့် ကလေးများ၊ မိခင်များ၊ အဘိုးအဘွားများအတွက် ပူပင်နေသည်။ ကျွန်မတွင်တော့ အပူသည် ရံဖန်ရံခါတော့ များပြားသည့် ဘ၀ တာဝန်များကြား ပေါ်လိုက်ပျောက်လိုက်ပင်။

တစ်ခါတလေတော့ ရွာကို မိသားစုကို အလွန်အမင်း ပူပန်နေတတ်သည်။ အပြေးသွားချင်သည်။ မိတ်ဆွေများ ရှေ့ မျက်ရည်ကျမိသည့်အချိန်လည်း ရှိခဲ့သည်။ သို့သော်လည်း မိဘများအသံကို ဖုန်းထဲက ကြားရုံနှင့် သက်ပြင်းချကာ စိတ်အေးတတ်သည့် အချိန်မျိုးလည်းရှိပြန်သည်။

တကယ်တော့ သေနတ်သံ၊ ဗုံးသံများသည် ကျွန်မတို့နှင့် စိမ်းသည်မဟုတ်။ နှစ်အတော်ကြာ ကြားဖူးနားဝ ရှိခဲ့သည်။ ထို့နောက် တစ်ဖန် ငြိမ်းအေးသွားပြန်သည်။ ဆယ်စုနှစ်ကို ကျော်လွန်ငြိမ်းချမ်းဆဲ လွန်ခဲ့သော နှစ်နှစ် နီးပါးကတော့ မိုးစက်များနှင့်အတူ ကျွန်မတို့ မြေ၌ မငြိမ်းချမ်းခြင်းသည် တစ်ကျော့ပြန်နိုးထခဲ့ပြီ။

ဇွန်၊ ဇူလိုင်လတို့သည် ကျွန်မအတွက် ခက်ခဲစွာ ဖြတ်ကျော်ရသည့်ကာလများ။ အဲသည်အချိန်က မိသားစုကို ပူပင်စိတ်နှင့် တစ်ဖက်တွင် မြို့ပြကို စွန့်ခွာရန်ခက် ခဲနေဆဲအနေအထားများအကြား ကျွန်မ ပြိုလဲမတတ် ဖြစ်ခဲ့ရသည်။ သို့သော် ရွာကလေးသည် ကာလရှည်ကြာ ဘေးကင်းဆဲ။ သည်တော့ မိသားစုထံက ပူပင်စိတ်သည် အိမ်ကိုစွန့်ခွာ ပြေးလွှားရသူတို့ထံ ကူးပြောင်းပေသည်။

အဲသည်နှစ်ကလည်း အစ်မသည် နယ်ပြန်ခဲ့သေး သည်။ သူအပြန်တွင် ဓာတ်ပုံများစွာ ပါလာသည်။ ကျွန်မသည် ထိုဓာတ်ပုံများကို ကြည့်ကာ သူ့ရှေ့တွင်ပင် မျက်ရည်ကျရသည်။

အ၀တ်အထည်နွမ်းနွမ်းလေးများနှင့် ကလေးတို့သည် ကင်မရာကို အပြစ်ကင်းစင်သော မျက်လုံးကလေးများနှင့် ငေးနေတတ်ကြသည်။ ငိုနေသော ကလေးလေးကိုလည်း တွေ့ရသည်။ ပဲပြုတ်တစ်ခွက်နှင့် ထမင်းစားနေကြသော ကလေးတို့ကို မြင်သည်။ ဒုက္ခသည်စခန်းက ကြမ်းပြင်ပေါ် စာကုန်းရေးနေကြသည့် ကလေးတို့ကို ရင်နာစဖွယ် တွေ့ရသည်။ စခန်းတို့သည် အမိုးအကာလုံ လုံခြုံခြုံလည်းမဟုတ်။ ဓာတ်ပုံတို့ကို တွေ့ရသောအချိန်သည်လည်း ဆောင်းကာလသာဖြစ်သည်။ သူတို့ ဘယ်လောက်များ အေးနေကြမလဲ။ ကျွန်မ မျက်ရည်တွေတွေ ကျနေသည်ကို အစ်မက ငေးနေသည်။

“ငို၊ ငို၊ ငိုချင်သလောက်သာ ငိုပေတော့။ ငါ့မှာတော့ ငိုစရာ မျက်ရည်တောင် မရှိတော့ဘူးဟ။ ငိုလည်း မငိုနိုင် တော့ဘူး။ ငါမြင်ရတဲ့ မြင်ကွင်းတွေ နင် အပြင်မှာ မြင်ရရင် နင်လည်း ငါ့လိုပဲ မျက်ရည်ကျန်တော့မှာ မဟုတ်ဘူး”

သူ လှမ်းပေးသည့် စာအုပ်ကလေးတစ်အုပ်ကို ကိုင်ထားသော ကျွန်မ လက်များကလည်း တုန်ယင်ချင်နေသည်။ မညီမညာရေးထားသော လက်ရေးလေးများကို မျက်ရည်များအကြားက ၀ိုးတ၀ါးမြင်ရသည်။ “သမီး အိမ် ပြန်ချင်တယ်”၊ “စစ်ပြီးရင် သား ကျောင်းပြန်နေမယ်၊ စာ လည်းကြိုးစားမယ်”၊ “ကျွန်တော် အသားဟင်းစားချင်ပါ သည်”။

အဲသည်တစ်ညနေက အားရအောင် ငိုချလိုက်ပြီး နောက်ရက်များတွင်တော့ အကြိမ်ကြိမ် မျက်ရည်ဝဲရသေးသော်လည်း ထိုတစ်ညနေကလောက် ရှိုက်ကြီးတငင် မငိုတတ်တော့ပါပြီ။

ခုလို အေးမြသည့်ကာလရောက်တော့ ထိုညနေကို သတိရသည်။ တွေ့မြင်ဖူးသော ပုံကလေးများကို သတိရသည်။ သူတို့သည် ဆောင်းရာသီနှစ်နှစ်ဆက်တိုက် လုံခြုံ နွေးထွေးသော နေအိမ်များနှင့် အဝေးမှာ ရှင်သန်ခဲ့ကြသည်။ အခက်အခဲများကို ရင်ဆိုင်ဖို့ရန် စိတ်နှလုံး ခက်မာခြင်း၊ မျက်ရည်ကြားက ရယ်တတ်ပြုံးတတ်သော နှုတ်ခမ်းများ ရှိကြခြင်းအတွက်တော့ လောကကို ကျေးဇူးတင်ပါသည်။

“ဒီနှစ် နွေ ကျွန်မပြန်ရင် စခန်းမှာ သွားနေဦးမယ်” ဟု ရန်ကုန်တွင် နှုတ်ဆက်ရသည့်ညနေက အစ်မကို ပြောခဲ့မိသည်။

“နင်ကလည်း အဲဒီလိုမပြောစမ်းပါနဲ့ဟယ်။ တော်ပြီ၊ နွေမရောက်ဘူး၊ စစ်ပြီးပြီလို့ပြော၊ အားလုံး အိမ်ပြန်ပြီလို့ပြော။ ဒီဆောင်းတွင်းတစ်ခုပဲ တော်ပြီ”

စကားပြောပြတ်တောက်သော၊ သို့သော် စိတ်နှလုံး ရိုးစင်းနူးညံ့ကာ ကြင်နာတတ်သော အစ်မကို ခုတလော သတိရနေသည်။ သူသည် မြောက်ဖျားမှာ။ အလွန်အေး သော ကျွန်မတို့ ဇာတိမြောက်ဖျားမှာ။ သူပြန်မလာသေးသည့်အတွက် ကျွန်မသည် သတင်းစကားများ အထူးတလည် သိရသည်မရှိပါ။

သည်ကြားထဲ သံလွင်ခက်နှင့် ချိုးဖြူတစ်ကောင် လက်တစ်ကမ်းကိုပင် ရောက်လာတော့မလိုလို သတင်းများ ထွက်ပေါ်လာလျှင်တော့ ၀မ်းသာစပြုလာပြန်သည်။ ဒါနှင့်ပင် မျှော်လင့်ချက်ထားလိုသည်။ အလင်းတစ်စ မြင်ရသလို ဆုပ်ကိုင်ချင်သည်။ ထိုအလင်း မကွယ်ပျောက်ပါစေနှင့်။ မကြာမကြာ ပေါ်လိုက် ပျောက်လိုက်ဖြစ်ရသလို ထပ်၍ မကွယ်ပျောက်ပါစေနှင့်။

ပြီးခဲ့သည့်တစ်ရက်ကတော့ ကျွန်မသည် အမေနှင့် ဖုန်းပြောစဉ် “အခု အေးနေပြီမဟုတ်လား” ဟု အဆန်းလုပ် မေးဖြစ်ပါသည်။

“အေးတာပ၊ ညဘက်တော့ တော်တော်အေးတာ”ဟု အမေက ဖြေရိုးဖြေစဉ်ဖြေသည်။

ကျွန်မ၏စိတ်အလျဉ်ကတော့ မြောက်ဖျားပိုင်းဆီ အ ပြေးရောက်သွားသည်။ တောင်တန်းများကို ဖြတ်သည်။ တောအုပ်များကို ကျော်သည်။ သစ်ပင်ငယ်အစုစုကို ဖြတ်သည်။ အကာအရံမလုံ့တလုံ တဲများအနီးတွင် ရပ်သည်။ ဖြူစင်သော မျက်လုံးလေးများစွာကို မြင်သည်။ သည်အခိုက် လေကြမ်းက စိတ်ကူး၌ပင် သုတ်ခနဲ နှင်လာသည်။

သူတို့ အေးနေရှာရော့မည်။

စံပယ်ဖြူနု
(ဇန်န၀ါရီလ၊ ၂၀၁၃၊ မျက်ရှု သုတ၊ ရသမဂ္ဂဇင်း)

3 comments:

ကောင်းလိုက်တာ :D နောက်အမြဲရောက်တော့မယ် ဆရာမ :D

ကျေးဇူး...ကျေးဇူး....:))

ဆရာမက ဆရာမလျန်နုလားခင်မျာ

Post a Comment

Twitter Delicious Facebook Digg Stumbleupon Favorites More